بعيداً عن البشر

بعيداً عن البشر ؛ فيه أشياء تانية بالرغم من كونها جمادات بس برده حتوحشني أوي


مترو الأنفاق
وداعاً وإلي اللقاء

كافتريا كلية الإعلام الجبلاية

ضحك ولعب ومفيش جد وبرده مافيش حب بالنسبالي بس الحق يتقال هي
الكافتريا ماقصرتش في حقي هيأت الجو النفسي والحبيبة حوالي في كل مكان
هي بس المشكلة منين اجيب النفس
صرفت فيها مصروفي لمدة أربع سنين ؛ وحاعمل ريجيم أما اتخرج

مدرجات وبنشات الكليه
حتوحشيني أوي وأنا تحتك بتكلم في التليفون وأنا ساندة عليكي بكتب محاضراتي ( حالة ندرة)
وانا مستسلمة للنوم في محاضرة ثقيلة

مكتبة كلية الإعلام
ممنوع الإقتراب من الأرفف
الكتاب اللي عاوزاه ببقى شايفاه أدام عيني اللي حيكلهم الدود على الرف أدامي

والأمينه تروح تجيبلي كتاب تاني خالص وتقولي ده اللي عندنا

سلالم الكلية
ياما قعدت عليكي ندردش أنا وصحابي
اتوسخت هدومي واتكرمشت
وياما قعدت عليكي اضرب الأبحاث في آخر يوم تسليم

مكتبة دار الشرق
وداعا للتوريق
وانا ماشية رايحالها واتخبط في أي حد من زمايلي معاه ورق
اصوره من غير معرف اي حاجة
حالة هلع ورغبه في جمع الملازم والورق والقصائيص


بيتنا
كنت دايما بتهرب منك عشان حاسة انك عاوزنا نرتبط وانا رافضة الأرتباط بجميع اشكاله
ياخوفي لعلاقتنا تتوثق الفترة الجاية ونخش في علاقة ارتباطية لافكاك منها