عيد ميلاد فرفوشة

الأثنين الماضي......... تمت فرفوشة سنة

ماكانش مزاجي يسمح بالكتابة ؛ ولا كان عندي وقت كنت مشغولة في كذا حاجة

اقول ايه .......هممممممممم

يعني هو انا ومدونتي بنشترك ان عيد ميلادنا في شهر واحد

بس هي تمت سنة انما انا حتم في 28 الشهر ده 22 سنه

بقالي 22 سنه ؛ بتنفس الأكسجين ؛ وازفر ثاني اكسيد الكربون...يااااااااااااه

في السنتيين اللي فاتوا حسيت اني عجزت اوي ؛ لا ولقيت في شعري شعريتين بيض فكرت اشدهم ؛ بس غيرت رأيي ؛ الشيبة ليها هيبتها برضه

اتخرجت والحمد لله

وبشتغل برضه والحمد لله

صحيح كل شهر بجرنال ؛ بس اعمل ايه هي ديه ظروف المهنة

صحيح ؛ بخصوص العمل ؛ اكتشفت ان الناس بتبص للحياة من خرم ابرة مصدية ؛ يعني لما اي واحد يشتغل في شغلانة بتدي مرتب محترم يقولك ده ليله مستقبل حتي لو الواقع بيثبت العكس ؛ جايز بيقبض 2000 دلوقتي وغيره بيقبض 200 بس هو حيفضل يقبضهم كمان 10 سنين ادام وغيره ده اللي مش ثابت في حته حيتخطاه بمراحل

يقولك شفلك شغلانة بمرتب ثابت ؛ ياعم اذا كانت الحياة نفسها مش ثابتة ؛ إذا كان وهو رايح الشغلانة الثابتة اللي بالمرتب الثابت تيجي عربية مش ثابتة تطيره تخلص علي

اعتقد ان احنا بندور عن الثبات عشان عارفيين ومتأكديين ان احنا مش ثابتيين ؛ ومسيرنا يوم نتزحلق

باختصار انا افضل ركوب الأمواج عن الجلوس علي الشاطيء في انتظار المد

فرفوشه لسه طفلة صغيرة انما صاحبتها خلاص داسها القطر

الحياة العاطفية والحمد لله .......على البلاط...أو علي رأي محمد صبحي...... اون سيراميك

ومش عارفة هو ده ميزة ولا عيب

يعني ايه الفايدة اني ارتبط مثلا في الجامعة وافشكلها بعد كده ...الحمد لله من 12 صاحبة مقربييين واحدة بس اللي كملت مع البني آدم اللي كانت مرتبطة بيه ايام الجامعة ولسه في مرحلة الخطوبة............... والله اعلم

وفي نفس الوقت ...القاعدة عل المصطبة ديه ؛ والواد خطيب اختي عمال يجيب في ورد وبتاع ؛ وعماليين يحبوا في التليفون لما ما بقتش عارفة اتكلم وفي الآخر الفاتورة تيجي ...عالية وماما تزعقلي انا واقولها هو انا اللي بحب في التليفون ؛ مافيش فايدة لا تصدق....حاجة تكسف يعني على اعتبار اني الكبيرة وكده

مش عارفة بين تنتن وتنتون ؛ القلب احتار

اجمل حاجة في فرفوشة انها ذاتية اوي ؛ وبعديين كسبتني انا سالي كقارئة ليها

ده في حد ذاته يحققلها اكتفاء عن باقي البشر ؛ لأن سالي مش بتقرا أي حاجة ؛

حتي لما بتضرب تقرير ولا تحقيق لزوم الشغل بتبقي عارفة كويس انها قالباه ؛ وما بتقرهوش ؛

بجد والله فرفوشة ديه محظوظة اوي ان ليها حد جميل زيي يقرالها

كل سنة وهي طيبة

وكل سنة وانا طيبة

وكل مايو واحنا بخير